يوم واحد ....حياة أفضل

يوم واحد..كلنا أنسان..نتعامل بأنسانيتنا مانبقاش حيوانات ..نتخيل أن الكل أم،أخت ،زوجة وحبيبة ؛كله خايف على كلة ..ومفيش حد بيخاف من حد كلة بيتعامل وبينظر بأنسانية نتعامل وكأننا داخل يوتبيا(مدينة فاضلة)أحنا الى أصدرنا قوانينها كله يساعد كله فيها.
فكرة جاءت لى وانا داخل مقر مجلتى شعرت بأننى لابد أن أفعل شىء، فقررت اشرح فكرتى على ورقتى، يوم فى السنه كله يشارك فيه كل يحس فيه بمعنى أن لية أخت بيخاف عليها أم ،حبيبه بيحميها ياريت كل يقف موقف تبادلية، اى تبادل المواقف بيننا ونتعامل على هذا .
عشان أحنا مش أجساد بتتعامل مع بعضها أحنا بشر روح وجسد لابد ان نتعامل بانسانية لا بشهوانية ،بأيدينا نوجه أنفسنا إلى الطريق الصحيح،بجد نفسى المعاملة تبقى بينا طبيعية أنا أخاف على الناس والناس بتخاف علية تعالوا نجرب يوم واحد بس نشوف أية الى هيحصل ..
أنا عارف أن فكرتى دية ممكن تكون غريبة بس بجد ياريت نعملها بجد أن مستنى ردودكوا عشان بجد نفسى نعمل حاجة بجد عايز نبقى شباب من غير أفكار مشوه نبقى شباب حرة فى أراءه وأحلامها وطموحاتها .
وأيضاً نعلو بأنسانيتنا الحل ،ليس فى أن نرمى اخطاءنا على الاخرين او نقول ان البنت هى السبب الرئيسى او الشاب هو السبب لابد من أن نقف مع أنفسنا ونحدد علاقتنا من الاخرين بجد اليوم ده هيفرق معانا كتييييييييييير، ياريت بجد يكون فى شباب متحمسة للفكرة عشان نبتدى مشروع( يوم واحد.. بيساوى..حياة أفضل) تحت شعار كلنا انسان انا مستنيكوا عشان نعمل اليوم ده ونحدد اهدافنا عشان بجد نكون على أستحقاق بكلمه أنسان أنا مستنيكوا طبعا بعد أذن مجلتى الى بحبها أحب أقول أنا مستنيكوا عشان نقوم بالفكرة دية فى مجلتى الجميلة كلمتنا......

عادل جمال الدين

Comments

لوجعان.. أو قلقان ..ما تقلقش كله تماما..أصبحت الحياة سهلة والحمد لله ,والأمور تيسرت بشرى لمرضى السرطان والسكر, بشرى للى مش لاقى رغيف العيش ,..لو أنت جعان ومش لاقى عيش لاسمح الله ,مع أنه متوفر والحمد لله بكثرة فى كل مكان ومش محتاج معارك طوابيرية ولا حاجة أحنا بس الى بنكسل عايزين كل حاجة تجلنا لحد عندنا , هو أه العيش فى شوية زلط واسمنت بس وماله أهوة أستثمار الواحد لو يفرز الزلط على جنب والاسمنت برده على جنب ممكن يبني له شقة على الأقل بدل ما هو عايش فى خيم , صحيح أحنا هنتأمر ما العيشة فل وتمام أدينا بنأكل ونستثمر يعنى حلينا أزمتين أكل وسكن وكمان غير دة ودة هنلاقى شغلانه بدل ما أحنا قاعدين على قهوة عم بش بش بنخترع فى (برتوكلات حكماء بشبوش )لأ وإلى زاد وغطى ..أحم أحم أسف ..قصدى ومن كرم أخلاقهم أنهم حلوا لنا أزمة اللحمة ,وبقت فى متناول الجميع , مش عارف أحنا عايزين أية بالضبط, صحيح ما يملاش عين ابن أدم غير التراب, يعنى كل واحد محتاج حصته فى اللحمة يروح يتصاحبله كده على حمارين تلاتة, عشان يتغذى عليهم بدل الأنمية الى ماشية فى البلد, وكمان يلا ياعم اللحمه دية أثبتت كفاءة فى جميع أنحاء الجمهورية ,وعلميا وبقرار عالى عالى اوى مش عارف الصراحه من أنهى دور بس اهو عالى وخلاص, ان اللحمه دية مفيدة وفيها سكريات وكمان بتمنع السرطان ,(طب ما صحيح بدل ما نادى بمستشفى 57357أية رايكم نرفع شعار حمارك فية صحتك وعشان برده الناس تعرف الحمير مفيدة أزاى وميشتمهاش تانى) , ومين عارف أحنا بعد كدة هنلاقى ميدان أسمة ميدان الحمير ونعمل تمثال للحمار عشان نديله حقة بقى, صحيح والله يا جماعة الى يشوف مصيبة غيره تهون علية مصيبته,خلاص من هنا ورايح لما نقول لحد انت حمار هيشكرنى طبعاً ده كفاية أنه موفر لنا كل حاجه ركوب وأكل وكمان دواء مش عارف والله أقولكم أية أن بجد عايز أشكرهم عايز أمدحهم على كل التسهيلات ديه .....انتوابجد حمير قلبى من جوة طبعا احنا اتفقنا ان ده شكر مش شتيمة صح ،يعنى باختصارمن غير كتر كلا م نرجع للأعلان ,ونقول خلاص مابقاش فيه مشاكل الحمير ملت البلد و لو جعنا فى مرة هنأكل ......كلنا حمير.

عادل جمال الدين

Comments

أبو العريف....
أصبحنا جميعنا< ابو العريف> كلنا نفهم كل شىء من غيرما نكون عارفين اى حاجة، بس ده كان متهيقلى مقتصر على الدجالين والجهلاء يعنى ايام ستى وستك زمان، لكن لما يبقى الدكتور والمهندس واصحاب التعليم العالى...ألخ، هما اللى يعرفه كل حاجة يعنى يبقى هما< ابو العريف> يبقى عوضنا على ربنا نقول اية بقى للناس البسطاء الى فاكرين ان كلامهم هو الصح أنا بجد مش عارف أقول اية بس هسيبكم مع الصور عشان تعرفه مده الحصره إلى انا فيه،ا لا اعلم هل سقراط كان على خطأ ولا يفقه شىء حينما قال:( أن أعلم أننى لا أعلم ولكنكم لا تعلمون أنكم لا تعلمون) لكن للأسف كلنا بقينا عارفين أن أحنا كلنا أبو العريفــــــ.

Comments

ما من شاعر في الحب إلا وكان الحزن ملهمه
ومامن جرح في القلب إلا ومرار الألم يطعمه
وما من حب صادقاً إلاويؤسره الدهر ويهدمه
وما من حبيب مخدوع إلا وعلى حبيبه يندمه
وما من مشتاق حائر إلا ونار الفراق تصدمه
وما من غنى في الحب إلا وكان فيه معدمه

Comments

وكان في أاستفتاء<تختار مين>أراء متضاربة وكثيرة وعندما سألت الناس انتوا بتختاروا مين كان الرد كالأتي:

أحمد عز ما بيعرفش يمثل:وده كان رأى احمد 20سنة طالب بكلية هندسة وقال كمان أنا مش عارف البنات بتحبة على أية.

عمرو دياب طبعا: هو نجم الموضة والنيو لوك ودة كان رأى شادي 21 سنة ليسانس حقوق.

أنا ما بحبش محمد رجب:وده كان رأى مروة ثانوية عامة قالت انه بتعتبره أغلس ممثل شافيته.

ميلودى تتحدى ..الكل مش الملل بس:ودة كان رأى خديجة 19 سنة بتقول أن أفضل قناة تلفزيونية وفضائية عشان بتشوف عليها كل حاجة.

حسن حسنى ..مادة أجبارى :ودة كان رأى محمد ثانوية عامة وقال أن حسن حسنى بيفكرنى بالمواد الاجبارى إلى علية كل سنة وما ينفعش أغيرها.

أليسا..جميلة ومغرورة:ودة كان رأى عادل 21 سنة أليسا رغم أنها تحتل الصدارة بإحساسها فأنها تطفىء جاذبيتها بغرورها.

أحلى ضحكة ..مي عز الدين:وكان أغلب الأصوات لمي عز الدين حيثوا أكدوا على أنها أحلى ضحكة في الدنيا.

ليوناردو دي كابري..أحلى تسريحة:ودة كان رأى حسن 15 سنة وقال أنا نفسي أبقى ممثل زيه عشان شعره ده .

بشرى ..مذيعة لامعة..وكان في رأى هبة 25 سنة أن بشرى تبقى مذيعة وتركز كل تركيزة في هذا عشان هي لذيذة وأمورة وكل الناس بتحبها أحسن من الأدوار إلى مش بتلاقي نفسها فيها.

أديني الحقنة بسرعة......:ببقول احمد 16 سنة أن دة أحسن أفية سمعتة لية فايدة ومعبر عن الموقف .

محمد منير..تراث مصري أصيل:أسامة 22 سنة بيقول بحس أن محمد منير مش بيعرف يختار ملابسه عشان كدة بحس أنة تراث مصري قديييييييييم.

كريم كوجك...ليس له هوية:ودة كان رأى أميرة 25 سنة بكاليريوس تجارة بتقول أن أرخم مذيع في الدنيا هو كريم كوجك وكمان مش بيعرف يمثل أنا مش عارف له هوية.

قام بالاستفتاء:
عادل جمال الدين

Comments

أسبيدرمان .....وصل يا جدعان.....!!!!؟؟؟؟

تخيل..طبعاً في الأول هتقولى مين ده إللى وصل أنت بتهيس ولا إية ثواني بس خلينا بجد نتخيل لو الشخصية الخيالية السينمائية دية معانا هنا في شوارعنا في وسطينا طبعا كلنا عارفين الشخصية دية عملت إية لما كانت في المجتمع الامريكى كلة أكيد شافها بس تعالى نتخيل لو هي هنا في مجتمعنا هيحصل إية تيجى نشوف ونتخيل الشارع هيبقى عامل ازاى حتى لو تخيلت أن أنت اسبيدرمان هتعمل أية، طبعا أول حاجة هتعملها هتروح نازل على أفران العيش عشان طبعا تساعد وتلاقيك ساعة (وهوب ..طاخ ..طيخ..)وأنت عارف بقى باقي اللي هيحصل وبعدما تخلص من معركة حطين بس دية في العيش ؛هتروح طالع على اقرب موقف موصلات عشان طبعا ًتساعد الناس هناك وتبداء المعركة الثانية..يلا.ها.في عربية جية وهوب..هوب وتلاقيك شغلت كل مواهبك وبردة نزلت تحت الإقدام ولا حياة لمن تنادى..وهترسى بيك في الأخر انك تاخد أتنين أتنين على كتفك وهوب تطير توصلهم وترجع تاخد تانى وهكذا...ربنا معاك..الله يكون في عونك،وبردة اسبيدرمان أكيد حالف يكمل المشوار ويساعد الناس ويروح أقرب منفذ بيع سلع استهلاكية يا جماعه الراجل نازل يساعد الناس ويقف ويبص حضرته على الناس ولما عرف إن الحاجة غليت..ساعة أتنين، وياتى المشهد على اسبيدرمان يقف في طابور الجمعية وبيزعق وبيقول {يا عم هو أنا كلمتك أنا جى أخد كسين سكر وأمشى هو مش كفاية العيشة مرة كمان هيبقى ما فيش حاجة تحليها.يلا ما علينا أكيد هيوصل ما دام مصمم كدة على انه يساعد الناس طبعا مش يأخذ السكر، رجع وفكر اسبيدرمان يساعد الناس ازاى..ازاى.هوب جتله فكرة .جهز نفسة وحضر خيوطه وطار ها رايح فين نزل على اقرب مكتب توظيف شباب وها هيساعد الشباب يلا يا شباب انتوا واقفين لية كدة ورايحين تقدموا في شغل إية وكان الرد الطبيعي المعتاد يا عم أنت هتهزر أقف ألحقلك دور هو أنا اعرف يا عم اشتغل اى حاجه تجيب فلوس هو أنا هتأمر وكان هذا الحديث في صوت رجل واحد وكأنهم يستعدون للمعركة وبمساعده المثل الشهير<الزن على الودان أمر من السحر>أفتكر انه بلا وظيفة وسمع الكلام....؟؟وأكيد هيفيض الكيل فيجرب إن يساعد المارة في الشوارع وينتهى به الحال كالأتي والنبي يا بنى شيلى كيسين الشنط دول عشان عمك الحاج جى بدري وعايزة اعمله الأكل....حاضر يا حاجة،الى بعدة، يا عم روح تساعد مين أحنا نفك في الحديد (وما خفي كان أعظم)....و....و.....و...بعد كل هذا نرى أن أفضل شيء يعمله اسبيدرمان لينا انه يتوضى ويصلى الفجر أو ويدعى وقت فجرية ويعرى راسة علينا ويدعلنا ويدعى علينا .
عادل جمال الدين

Comments

عايز تقول رأيك.........خش الحمام!!!!!
دائماً..نتكلم عن آراءنا والتعبير بحرية عن شخصيتنا وأحلامنا،دوماً نرى أنة من حقنا أن نتكلم بكل طلاقةوحريةلكن السؤال هنا هو أين نعبر عنها...؟أين نعبر بكلامنا بحرية بلا قيود...؟
أكيد حد هيجوبنى ويقول يعنى أعبر فين أروح اشتغل صحفي يعنى.ماشى أنا موافق بس مش بقول انك لازم تبقى صحفي بمعنى الكلمة عشان تعبر عن رأيك لا ممكن نعبر عن آراءنا الصغيرة والكبيرة أيضا ًأينما كانت على مجلة حائط في جامعتنا مدرستنا ولكن للأسف أنتهي بنا الحال أن نكتب ونتكلم على حوائط الحمامات ونعبر بحرية مطلقة بل ونبدى باستياء شديد الأوضاع الراهنة ونقول النصيحة ولا تقف الحياة على ذلك بل أيضا أصبح الحمام مركز للدعوة , أتذكر يوما كنت في حديثي مع صديق لي عن هذا الموضوع فقال لي أن الحمامات أصبحت مجلة الجامعة< فأي حد عايز يقول راية بصراحة وبدون خوف كل إلى علية يجهز أقلامه يبدأ في الكتابة على الحائط لكي يشكى للحائط همه والعجيب أن رأيت إعلانات ومواقع للشات والتعارف وأرقام الموبيلات التي يحث فيها صاحبها على أن يلتقي بأصدقاء جددأتساءل كثير هل هذا ما توصلنا له نحن الشباب هل هذا سببة الخوف وما سبب هذا الخوف فمن من نخاف أومن الممكن أن يكون عدم توعيتنا بأن لابد أن نشارك برأينا لا أدرى أفلابد عندما أقول رأى بصراحة أن أدخل حمام أو ما شبة ذلك,هل أصبحت فعلا حمامات الجامعة جريدة أو مجلة فكرية تتلقى جميع الآراء الحرة .يا شباب لوكان ابسط حقوقنا لا نفعله وهو أن تقول رأيك وبصراحة فنخفي على حائط ما يخرج من أفواهنا فماذا ننتظر من الآخرين.....!! يحققوا لك مستقبلك..؟ولا أقولك عايز تقول رأيك.......خش الحمام.!!!!!!
(نعيب على زماننا والعيب فينا وما لزماننا عيب سوانا)

عادل جمال الدين

Comments

إلى متى أحب من طرف واحد؟إلى متى أنغمس أنا في الأحزان والآلام ومحبوبتىلا تشعر ولا تحس بي؟ولو عرفت تعطى لي ظهرها,إلى متى أبقى أسير لحب لا يتواجد في هذا الزمن المادي؟ولو أحببت لا أجد الحب وإذا سلمت للعالم المادي يتهيألى أن الحب ينادى عليه وعندما أرجع إليه يقابلني بسلاحه البتار إلا وهو الحرمان,فأنا أشعر ألان أنني في بئر من الحرمان والآلام, ليتني كنت لا أعرف الحب ولا حبيت ولا كنت رأيت حنين زائف في عيون حبيبتي,حنين كان يجعلني كأنني ملكت الدنيا وما عليها،كانت أحلى أيامي في أيام الجفاء,أيام كانت تمر على مثل السنين المظلمة وكانت هي الشمعة التي أضاءت لي في الظلمات ولكن عندما أقتربت منها لكي أتشبث بها في نظرات عينيها أقترب منها لكي أتمسك بها لكي تبقى معي أنطفئت و انطفئ معها أنوار حياتي واختفت من جديد في الظلمات, كان كل ذنبي أنني اعترفت لها بحبي فمات قلبي قبل أن يشب ويكبر لأنه أتوأد في الرمال,فأنا ما زلت وحيدا في ظلماتي وأحزاني وليلى..غريب عن كل شيء ..حتى ليلى هذا فمن ألان ليس من حقي أن أقول حتى ليلى,الشيء الوحيد الذي يؤنسني في وحدتي هو قلمي أشكو له همي وأحكى له ولكن للأسف الشيء الوحيد الذي يسمع ألامي وأحزاني لا يجاوبني ألا بالصمت الرهيب.........

عادل جمال الدين

Comments

تعرف تلعب وشوو.....؟؟؟؟
أنا عارف أنه سؤال غريب عليك ممكن تكون سمعته قبل كده وممكن لأ بس عمرك عرفت إيه هو الوشو كلعبة< قوانينها أساليبها> .
لعبة الوشو تعتبر اللعبة الأم لإلعاب الفنون القتالية عامهً لها قوانينها وأساليبها وفلسفتها الروحية الجميلة التي بدأت منذ أكثر من5000سنه واستمرت حتى ألان ؛وأصبحت اللعبة معروفه ومشوقه وعندما قابلت كابتن عيد محمد مدرب الوشو كنغوفو بالاتحاد المصري والعربي ومدرب بعض أساليبها المختلفة عرفني أكتر عن اللعبة.
لعبة الوشو لعبة روحية قبل ما تكون بدنيه.
لعبة الوشو في الأصل كانت طقوس دينيه وأخترع عابد صيني بعض الأوضاع القتالية لتنشيط الروح والجسد حتى لا تمل من الطقوس وأيضاً للدفاع عن النفس ضد اللصوص؛وكانت اللعبة غير منتشرة بسبب أغلقاهم على نفسهم ولكن يرجع الفضل ل<بر وسلى>وفلسفته القتالية في إظهارها ولولاه لكانت انقرضت فلابد من وجود تشجيع للعبة حتى لا تموت.
الوشو أخلاق وليست رياضة فقط.
تعلم لعبة الوشو الأخلاق الحميدة وتهدر الطاقات الزائدة لدى الإنسان فنرى أغلب اللاعبين للوشو أو اى فنون قتالية اقل عنف من الإنسان العادي أم بالنسبة للمدرب فأنه لا يحق له أن يعطى الفن لمن لا يستحقه فالفنون القتالية تبنى على الأخلاق.
وأهم مبدأ للعبة هو (التناغم بين الروح والعقل والجسد)يعنى جمع النقيضين القوة واللين السرعة والهدوء التركيز ورد الفعل السريع؛لعبة الوشو أو الفنون القتالية عامه ليس هدفها العنف ولكن التوازن بيت البدن والروح،والصبر أهم الأشياء في اللعبة وهو أن تفصل روحك عن المكان يعنى قوة التحمل هي أساس اللعبة.
كل واحد فينا جواه طاقة داخلية.
ودة كان رأى الكابتن لما أتكلم عن فلسفة اللعبة يعنى لو أنا عندي قناعة أن أنا ها كسر لوح الخشب إلى قدامى هكسره ودية اسمها <الأراده الداخلية>.يعنى كل واحد فينا جواه طاقات و إمكانيات؛ وأصل اللعبة هي التدريب الباطني قبل الظاهري يعنى تعرف أية إلى جواك عشان تقدر تحدد هدفك من اللعبة .
الوشو مش أله قتال..!!!!!!
أيوة الوشو مش لعبة قتالية وخلاص ولا هدفها أخراج أله قتالية بلا روح لكن تناغمك مع روحك وجسدك معا عقلك وحركاتك هي دية الوشو وباقي الفنون القتالية.
أزاي نلعب وشو............؟؟؟؟؟؟؟؟؟
ودية كانت نصائح من الكابتن لأي مبتدأ عايز يلعب وشو أو أي لعبة قتالية أخرى.
أولا:حب اللعبة وتحديد هدفك منها.
ثانياً:نقراء عن فلسفة الفنون القتالية عامه عشان نكتسب خبرات اكتر وفى الأغلب فلسفة الفنون القتالية واحدة.
ثالثا:الروح القتالية لدى اللاعب يعنى الإرادة القوية والتناغم بين الجسد والروح.
وأخيراً:التواصل والاستمرار في اللعبة والمشاركة في المنافسات بعد دخولك للعبة.
جوة كل واحد فينا طاقات أمكانيان وقدرات ساعات ممكن نوصلها وساعات تتوه مننا؛ ياريت نقدر نوصل للجوانا ونحقق هدفنا ونشوفه ونلمسه ونقدر نخليه واقع ؛هي دية فلسفة الوشو ولعبة الوشو؛ بجد دية مش بس رياضة بدنية دية رياضة روحية تعطى الثبات والثقة بالنفس والقوة والتواضع الصبر تعطى للعالم مقاتل <إنسان>يكفى أن تحية اللعبة هي(الكف والقبضة)وهى تعبر على الإنسان المتكامل الكف وهو الظاهر ويعبر عن التواضع والسلام والقبضة الداخلية تعبر عن القوة.
وأنهى كلامي بمقولة للراهب <شولن>.
دائماً يوجد في مكان ما الأفضل منك ولكن لا تعلمه.

Comments

مين فينا عارف نفسة مين فينا شايف أنه عارف كل حاجة تقدر
توصف نفسك عمرك حسيت انك غريب عن نفسك عن بيتك جوة كل واحد فينا طاقات إمكانيات قدرات ساعات ممكن نوصلها وساعات تتوه مننا؛مين فين عارف أية جواه إية هو حلمه إلى عايش معاه هنقدر نعرف.؟؟ ولا هنفضل تايهين في الطريق لمداه؛ مين فينا عايز يدخل جواه يعرف في أية طب مين فينا بيخاف وبنخاف ليه يلا نجرب أنا وأنت وأنت ِأيوة أحنا هنشوف ونعرف أحنا عايزين أية أنا عايز قلوبنا ما تملهاش الخوف ونمشى على الطريق وما نقعش وأحنا بنشوف كلامنا بسيط مش محتاج تفكير محتاج بس نحسه ونعرف إية ممكن يحصل عشان التغيير صحيح إلى قال أنا أعلم أنني لا أعلم أحسن بكتيرعارفين ده كان إنسان قدر يعرف إيه إللى جواه وقدر يمشى الطريق لمداه؛فهمت أنا عارف أنك تهت أقولك حاجة أتقالتلك واتقالتلى كتير أعرف نفسك صدقني ده أحسن تغيير؛بس عايزين نعرف بجد أحنا عايشين فين ...؟سؤال غريب مش كدة على فكرة أحنا بنسأله لنفسنا ألف مرة بس للأسف ما بنلاقيش إجابة أنا عايش جوه حلم ولا واقع مع حلم يعنى أنا عايش بهرب من الواقع بتاعى عشان كدة بحلم ولا أنا عايش الواقع وبحلم عشان أغيرة يا ريت نقدر نحدد أحنا عايشين فين عشان نقدر نكون أحنا من غير تبديل من غير هروب من حلمنا لحلمنا بس الفرق كبير أحنا ساعات بنحلم عشان نهرب من إللى أحنا عايشينه لكن في ناس بتحلم عشان تحقق حلمها..!!!!ممكن أسال سؤال أنت عايش أنهى حلم فيهم ..؟؟يا ريت نعرف عشان نقدر نحلم لأن<ليس الفقير الذي لا يملك مالا ولكن الفقير هو الذي لا يملك حلما ًوياريت حد يجاوب على سؤالي(أحنا عايشين لحلمنا ولا في حلمنا......؟؟؟؟؟؟)
عادل جمال الدين

Comments